တစ်ခါတုန်းကကျွန်တော်လေးစားချစ်ခင်ရတဲ့ဆရာမတစ်ယောက်ကသူမမွေးနေ့အမှတ်တရပွဲလေးမှာ
ကံစမ်းမဲဖောက်ပါတယ်။သူမ ဖောက်မယ့်စာအုပ်တွေထဲမှာရှားပါးစာအုပ်တွေပါတယ်။ရှပ်အင်္ကျီလက်ရှည်အဖြူတွေ
ပါတယ်။မွေးနေ့ပွဲကျင်းပတာကဆရာမရဲ့အိမ်ခန်းကျဉ်းလေးထဲမှာဖြစ်ပြီးတော့မဲနှိုက်ရမှာကဆရာမရဲ့အနီးဆုံးမှာ
ရှိတဲ့ကျွန်တော်အပါအ၀င်စုစုပေါင်းတပည့်လေးငါးယောက်လောက်ပါပဲ။ဆရာမကမဲလိပ်ကလေးတွေမှာ
အင်္ကျီ၊ ပုဆိုး၊ စာအုပ်စသဖြင့်ရေးပြီးမဲလိပ်တွေကိုဖလားတစ်လုံးထဲမှာထည့်ပြီးခလောက်ပါတယ်။ပြီးတော့
ကျွန်တော်တို့အလှည့်ကျနှိုက်ကြရတယ်။စာအုပ် ပေါက်တဲ့လူက ပေါက်၊ပုဆိုးပေါက်တဲ့ လူက ပေါက်၊
အင်္ကျီအဖြူရောင်ပေါက်တဲ့လူက ပေါက်။ပေါက်တဲ့လူက ပေါက်။ကျွန်တော်က
အင်္ကျီအဖြူတစ်ထည်၊
ပုဆိုးတစ်ထည်ရယ်မဲပေါက်ပါတယ်။အင်္ကျီအဖြူကတော့ကျွန်တော်လိုချင်တဲ့အရာဖြစ်လို့ကျွန်တော်ပျော်ပါတယ်။
ပုဆိုးကိုတော့ ၀တ်စရာသိပ်မလိုတဲ့ တိုင်းတစ်ပါမှာ များများမရှိလည်း ရတယ်လို့
ယူဆထားတာကြောင့် သာမန်ပဲ ခံစားရပါတယ်။ ကျွန်တော့်မှာ တစ်ထည်၊နှစ်ထည်
ရှိနေတာလည်း ပါပါတယ်။အဲဒီအချိန်မှာ
ကျွန်တော့်သူငယ်ချင်းတစ်ယောက်ကပုဆိုးလိုချင်ကြောင်း
ပြောပြီးသူမဲပေါက်တဲ့အင်္ကျီအဖြူနဲ့အလဲအလှယ်လုပ်ဖို့ပြောပါတယ်။
ကျွန်တော်ချက်ချင်းလက်ခံလိုက်ပါတယ်။ဘာလို့လဲဆိုတော့ကျွန်တော့်လုပ်ငန်းခွင်မှာအင်္ကျီအဖြူဟာမဖြစ်မနေ
လိုအပ်ပြီးတော့ကျွန်တော်ကိုယ်၌ကလည်းအင်္ကျီအဖြူဝတ်ဆင်ရတာ နှစ်သက်မိလို့ပါပဲ။
- ၂ -
တစ်နေ့။
ကျွန်တော်နဲ့အလုပ်အတူလုပ်ရတဲ့၊ညီတစ်ယောက်လိုခင်ရတဲ့
ကောင်လေးတစ်ယောက်ကအင်္ကျီအဖြူတစ်ထည် လက်ဆောင်ပေးပါတယ်။သူ
နှစ်ခါဝတ်ပြီးပါပြီတဲ့။အခုတော့သူနဲ့ကျပ်နေလို့အစ်ကိဝတ်ကြည့်ပါဆိုပြီး
ပေးလာပါတယ်။
သူပြောနေစဉ်မှာပဲကျွန်တော့်စိတ်ကအမှန်တကယ်ပီတိဖြစ်မိပါတယ်။ဆရာမဆီကအင်္ကျီနှစ်ထည်မဲပေါက်ပြီးတဲ့နောက်မှာ
အင်္ကျီအဖြူနဲ့ဝေးနေခဲ့တာအတော်ကြာခဲ့ပါပြီ။ကုန်တိုက်တွေ
ရောက်တိုင်းရှာရတာလည်းအမောပါပဲ။ တွေ့ရင်လည်း ဈေးကြီးနေလို့။ ဈေးသင့်ပြန်
ရင်လည်းကျွန်တော်နဲ့အံဝင်ခွင်ကျမဖြစ်လို့။အကြောင်းအမျိုးမျိုးနဲ့အင်္ကျီအဖြူနဲ့စိမ်းနေခဲ့ရပါတယ်။အလုပ်ထဲက
အဆောင်ပြန်ရောက်ရောက်ချင်း ကောင်လေးက ကျွန်ေ တာ့အခန်းထကဲ
ိုအင်္ကျီလေးကိုင်ပြီးဝင်လာပါတယ် ။
အင်္ကျီလေးကအသားကောင်းပြီး
ကော်လံမှာနည်းနည်းညစ်နေတာကလွဲရင်ကျွန်တော်နဲ့ကွက်တိပါပဲ။အဲဒီအင်္ကျီလေးကို
တခြားလျှော်စရာရှိတာတွေနဲ့ရောပြီးချက်ချင်းကျွန်တော်ဒိုဘီပို့လိုက်ပါတယ်။ခါတိုင်းဆိုအ၀တ်တွေကိုကျွန်တော်က
ကိုယ်တိုင်လျှော်နေကျပါ။အဲဒီနေ့ကမှအင်္ကျီအဖြူလေးပါလို့ဆိုတဲ့စိတ်ကူးနဲ့ဒိုဘီဆိုင်ကိုပို့ဖြစ်ခဲ့တာပါ။ဒိုဘီဆိုင်ကိုလည်း
မှာခဲ့ပါတယ်။ အင်္ကျီအဖြူလေးကို သီးခြား မီးပူတိုက်ပေးပါလို့။
- ၃ -
အဲဒီနေ့ကကျွန်တော်တို့ဆိုင်မှာလူတွေ တော်တော်ကျပါတယ်။ကျွန်တော်တို့ဆိုင်ကအွန်လိုင်းလောင်းကစားဆိုင်လေး
ပါ။ ကစားသမားတွေကို ကျွန်တော်က ကောင်တာကနေ ပိုက်ဆံထည့်ပေး၊ ကောင်လေးက
ပိုက်ဆံကောက်။ ကောင်လေးကလည်းတစ်ယောက်တည်း ခြေတိုလောက်အောင်
ပြေးလိုက်လွှားလိုက်ပိုက်ဆံကောက်ရပါတယ်။
ကျွန်တော်ကလည်းစက်နံပါတ်တွေ၊ပိုက်ဆံအမောင့်တွေကအစသတိကြီးကြီးနဲ့ထည့်ပေးနေရပါတယ်။တစ်ယောက်ယောက်က
အမှားအယွင်းဖြစ်သွားလို့
ငွေရေးကြေးရေးအရနစ်နာရင်အလုပ်လုပ်ကြတဲ့ကျွန်တော်တို့နှစ်ယောက်ပဲနစ်နာတတ်ပါတယ်။
ဒါကြောင့်အထူးဂရုစိုက်ရပါတယ်။အဲဒီအချိန်မှာ
ကောင်လေးကကစားသမားတစ်ယောက်စက်ထဲကိုပိုက်ဆံထည့်ဖို့ အော်ပြီး
ပိုက်ဆံယူဖို့ကို မေ့နေခဲ့တယ်။မေ့ရုံတင်မကဘဲတခြားစက်တွေကိုတောင်ထပ်ခါထပ်ခါ
အော်နေပါသေးတယ်။
အားလုံးအလုပ်သိမ်းချိန်ရောက်လို့စာရင်းစစ်လိုက်တော့ပိုက်ဆံကလိုနေပြီ။ကျွန်တော်နဲ့ကောင်လေးနဲ့ ခေါင်းချင်း
ဆိုင်ရပြီ။ဘယ်လိုမှလိုက်လို့မရတော့တဲ့အဆုံးCCTV ပြန်ချက်ရတဲ့အဆင့်အထိ
ရောက်သွားတယ်။အဲဒီတော့မှ ကောင်လေးကပိုက်ဆံထည့်ဖို့ အော်ရုံသာ အော်ပြီး
မယူမိတဲ့သူ့အဖြစ်သူ ပြန်မှတ်မိသွားတယ်။ကျွန်တော်
ကောင်လေးကိုဆူပစ်လိုက်တယ်။တစ်နေ့လုံးအလုပ်လုပ်မှ ဘယ်လောက်ရတာကအစ၊အဲသလို
နေ့တိုင်းဖြစ်နေရင်အလယ်၊လူအများကြီးနဲ့ဆက်ဆံရတဲ့နေရာမှာနာစရာ
ရှိရင်
နိုင်ငံခြားသားတွေဖြစ်တဲ့မင်းတို့ငါတို့သာအထိနာမှာအဆုံး။ကျွန်တော့်စကားသံမှမဆုံးသေးဘူး။
ကောင်လေးဆီက တုံ့ပြန်လာတဲ့ စကားကြောင့် ဆက်ပြောမယ့်
ကျွန်တော့်အသည်းကနစ်ဝင်သွားရတယ်။ကောင်လေးက...
‘‘ကျွန်တော် အစ်ကို့ကို ပေးထားတဲ့ အင်္ကျီဖိုးလောက်မရှိပါဘူးဗျာ’’တဲ့။
ကျွန်တော် ကောင်လေးကို ဘာမှ မပြောတော့ဘဲ ငြိမ်
နေလိုက်တော့တယ်။
- ၄ -
အဲဒီညနေကဒိုဘီက ပြန်ယူလာတဲ့၊မီးပူကော့နေတဲ့အင်္ကျီအဖြူလေးကို ကောင်လေးကိုကျွန်တော် ပြန်ပေးလိုက်တယ်။
ကောင်လေးက စိတ်မကောင်းတဲ့ အမူအယာနဲ့ ကျွန်တော့်ကို ပြောလာတယ်။
‘‘အစ်ကိုပဲ အင်္ကျီအဖြူ ကြိုက်တယ်ဆို’’တဲ့။
ကျွန်တော် အသာပဲ နှုတ်ဆိတ်နေလိုက်တယ်။ ကျွန်တော်တို့
ကြိုက်တယ်ဆိုတဲ့အရာတွေဟာတစ်ခါတစ်ခါမှာ အမှန်တရားကိုတောင်
ထုတ်ဖော်မပြောရဲလောက်အောင် ကျွန်တော်တို့ကို ထိန်းချုပ်ထားတတ်ပါတယ်။
ဟုတ်ကဲ့... ။ ကျွန်တော် အင်္ကျီအဖြူ ကြိုက်ပါတယ်။
ဒါပေမယ့်... ။
အင်္ကျီအဖြူထက် အမှန်ကို အမှန်အတိုင်း မကွယ်ဝှက်တမ်း ပြောခွင့်ရရေးကို ပိုပြီးတော့ ကြိုက်ပါတယ်။
လူခါး
စာပွင့်လွှာမဂ္ဂဇင်း၊စက်တင်ဘာ။၂၀၁၂
No comments:
Post a Comment