Sunday 13 November 2016
အလွမ်းအရပ်ကရေးတဲ့စာ
တစ်ယောက်အပြုံးတစ်ယောက်ကြည့်ရင်း
တဖွဖွပြောရမဲ့စကားတွေကို
မက်ဆေ့ခ်ျဘောက်ကနေ
အသက်မဲ့သလို ပို့လွှတ်နေရတယ်။
ကမ္ဘာကြီးရဲ့ဘယ်အခြမ်းမှာ မင်းကနေပြီး
ကမ္ဘာကြီးရဲ့ဘယ်အခြမ်းမှာ ငါကရှိနေတာလဲ
အတွေးက မဆုံးဘူး။
တစ်ယောက်လက်ဖဝါးတစ်ယောက်ထွေးထားရမဲ့အချိန်မှာ
တစ်ယောက် နဲ့တစ်ယောက်ဟာ သူစိမ်းတွေလို ဝေးလို့။
လွမ်းတဲ့အကြောင်းတွေပြောလည်းအသက်မပါဘူး
ဆွေးတဲ့အကြောင်းတွေကြားရတာလည်း
မလတ်ဆတ်ဘူး။
အေးစက်နေတဲ့ထမင်းခဲတွေကို
တစ်ယောက်တည်းမျိုချရတဲ့နေ့မျိုးဆို
အလွမ်းဟာ
ခါးခါးသီးသီး နင့်တယ်။
တဖွဲဖွဲကျနေတဲ့နှင်းတွေထဲ
စက်ဘီးတစ်စီးကို အဖော်ပြုရင်း
အလွမ်းတွေနဲ့မတွေ့အောင်
ကွေ့ရှောင်နေရတယ် ဒီမှာ။
ဘီယာတွေလည်းအရင်လိုမမူးတော့ဘူး
အရက်တွေလည်းအရင်လိုမသောက်တော့ဘူး
လိမ္မာပါပြီ။
အရမ်းသတိရလာတဲ့အခါ
ဟန်ထူးလွင်ရဲ့သတိရရဲ့လား သီချင်းကိုနားထောင်ပြီး
အရမ်းလွမ်းလာတဲ့အခါ
တိတ်တဆိတ် ကြိတ်ငိုလေ့ ရှိပါတယ်။
ကိုယ်လိုမဟုတ်တဲ့လူတွေနဲ့မတွေ့ဖို့ဆုတောင်းပြီး
သူလိုမဟုတ်တဲ့ကိုယ့်ကိုလည်း
မတွေ့ကြပါစေနဲ့ ဆုတောင်းပေးထားတယ်။
ဘုရားရှိခိုးတယ်
စာရေးတယ်
မိတ်ကောင်းဆွေကောင်းတွေနဲ့ စကားဆိုတယ်။
သိပ်လွမ်းလာရင်တော့
Off line ဖြစ်နေတဲ့ မင်းနံပါတ်ကို
စာတွေ တဒိုင်းဒိုင်းပစ်လွှတ်နေမိတာပါပဲ။
ခွင့်လွှတ်နေလိမ့်မယ် ထင်ပါရဲ့။
လူခါး
11.11.2016,fri.
15.07 pm
Ora,japan
Labels:
ကဗျာ
Subscribe to:
Post Comments (Atom)
No comments:
Post a Comment