ဆံပင်ညှပ်ဆိုင်ကလေးထဲသို့ ရောက်သွားချိန်တွင် ဆိုင်ကလေးထဲ၌ လူသုံးယောက်က ကျွန်တော့်အရင်ရောက်နှင့်နေကြပြီ။ တစ်ယောက်ကခပ်၀၀ ကတုံးဆံတောက်ဆံပင်နှင့် အသက်ရှစ်နှစ်ခန့် မလေးကောင်ကလေး။ နောက်တစ်ယောက်က အသက်ခုနစ်ဆယ်ခန့်၊ ပိန်ပိန်ပါးပါး၊ ကပိုကရို အ၀တ်အစားနှင့် တစ်ခေါင်းလုံးဖြူနေပြီဖြစ်သော တရုတ်အဖိုးကြီး။ နောက်တစ်ယောက်က အရပ်ထောင်ထောင်မောင်းမောင်း၊ ခန္ဓာကိုယ်ခပ်တောင့်တောင့် အိန္ဒိယအမျိုးသား။
`ဟင်း´ခနဲ ကျွန်တော်သက်ပြင်းချလိုက်ချိန်တွင် ဆံသဆရာက `မင်းရှေ့မှာ သုံးယောက်ရှိတယ်´ ဟု မျက်နှာရှုတည်တည်ဖြင့် လှမ်းပြောသည်။ `ရပါတယ်´ ဟူသော သဘောမျိုးဖြင့် ကျွန်တော်အသာလက်ကာပြလိုက်သည်။ သူ့ကို တစုံတရာပြန်ပြောဖို့ထက် ကျွန်တော်ကို ကျွန်တော်သာ စိတ်တိုနေမိခဲ့သည်။
အမှန်တကယ်ဆိုလျှင် ကျွန်တော်သည်သာ ဤဆိုင်ကလေးသို့ အရင်ဦးဆုံး ရောက်နှင့်သောသူဖြစ်သည်။ သို့သော်ကျွန်တော်ရောက်သွားချိန်၌ ဆိုင်ကလေးထဲတွင် ဆံသဆရာက မရှိ။ ဆံပင်ညှပ်ပြီးမှ သွားပို့မည်ဟူ၍ စိတ်ကူးဖြင့်ယူလာခဲ့သော လျော်ရန်အ၀တ်တို့ကို ဆံပင်မညှပ်မီ သွားပို့ပစ်လိုက်မိသည်။ ဤသည်က နောက်ကျရခြင်း၏ အကြောင်းရင်း။
မတတ်နိုင်တော့ ။ နီးရာခုံတစ်လုံးတွင် ကျွန်တော်စိတ်ပျက်လက်ပျက် ထိုင်ချလိုက်သည်။ ဆိုင်ခန်းမျက်နှာကျက်တွင် ချိတ်ဆွဲထားသော ပန်ကာကြီးက အားအင်ကုန်ခန်းနေသူတစ်ယောက်လို မလည်ချင်လည်ချင်နှင့် လေးလေးတွဲ့တွဲ့ လည်ပတ်လျှက်ရှိသည်။ အပြင်ဘက်တွင် အစွမ်းကုန် ပူနေသော နေက ဆိုင်ကလေးထဲသို့ လာငွေ့နေသည်ဟု ခံစားရသည်။ လူတကာတို့၏ ခေါင်းထက်မှ ထိုးညှပ်ချထားသော ဆံပင်တို့က ဆိုင်ကလေး၏ ကြမ်းပြင်ပေါ်တွင် ရှုပ်ပွနေကြသည်။ အရပ်ခပ်ပျတ်ပျတ် မုတ်ဆိတ်မွှေး၊ နှုတ်ခမ်းမွှေး ထူလပျစ်နှင့် အိန္ဒိယအမျိုးသား ဆံသဆရာက လူအပေါင်းတို့အား သန့်စင်ရှင်းလင်း ပေးရတာ ၀ါသနာထုံသလောက် သူကိုယ်တိုင်က အမွှေးအမျှင်ဗရပွနှင့် နေရတာကို နှစ်သက်ပုံရသည်။ ပါးစပ်တစ်ခုလုံး ဖုံးမတတ်ဖြစ်နေသော နှုတ်ခမ်းမွေးများအောက်မှ လျှာကို ပြူတစ်ပြူတစ်ထုတ်ကာ နှုတ်ခမ်းကိုသပ်လိုက် ၊ စကားပြောလိုက်၊ ဆံပင်ညှပ်လိုက်ဖြင့် သက်တောင့်သက်သာရှိလှသည်။ ကျွန်တော့်မှာ ကိုယ့်ကိုကိုယ်သာ ထပ်၍အပြစ်တင်နေမိတော့သည်။
ကျွန်တော်နေထိုင်သော ဤရပ်ကွက်ကလေးထဲတွင် ဆံပင်ညှပ်ဆိုင်နှစ်ဆိုင်ရှိသည်။ ပထမဆုံး ကျွန်တော်သွားခဲ့သောဆိုင်သည် တရုတ်တစ်ယောက်၏ဆိုင်ဖြစ်သည်။ မလေး၊ တရုတ်၊ အင်္ဂလိပ် သုံးဘာသာဖြင့် `ဆံပင်ညှပ်သည်´ ဟုရေးထားသော အနီရောင်ဆိုင်းဘုတ်ကြီးက ခန့်ထည်လှသည်။ ဆိုင်ကလေးသည် လေအေးပေးစက်၊ ရေသန့်စက်အပါအ၀င် အခြားခေတ်မှီ အသုံးအဆောင်ပစ္စည်းများဖြင့် ခန်းနားထည်ဝါလှသည်။ သို့သော် ဆံပင်ညှပ်ဆရာမှအပ တခြားဖောက်သည်တစ်ဦးတလေမျှ မတွေ့ရ။
ဆိုင်ထဲရောက်စက ကျွန်တော်အံ့သြမိသော်လည်း ကျွန်တော့်ဆံပင်အား ညှပ်နေသည့် နာရီဝက်လောက်အတွင်းမှာတော့ အံ့သြမှုက ကြက်ပျောက်ငှက်ပျောက် ပျောက်သွားတော့သည်။ သူ့စကားအားယုံ၍ လာခဲ့မိသော ကျွန်တော့်ကို ကျွန်တော်သာ နာကျင်အောင် လုပ်ပစ်လိုက်ချင်သည်။
ဆံသဆရာတရုတ်နှင့် ကျွန်တော်က ကျွန်တော်၏ အလုပ်ခွင်ဖြစ်သော သစ်သီးဆိုင်ကလေးထဲတွင် ဆုံခဲ့ကြခြင်းဖြစ်သည်။ သူသည် တရုတ်လူမျိုးပီသစွာ စကားအပြောကောင်းသည်။ သူ့ဆိုင်ကလေးသည် ကျွန်တော်တို့ မြန်မာလူမျိုးများအတွက်ပင် တကူးတက ဖွင့်ထားသယောင်ဖြစ်အောင်ပြောခဲ့သေးသည်။ ဘင်္ဂလား၊ နီပေါ၊ ထိုင်း၊ ဖိလစ်ပိုင် မည်သည့်အလုပ်သမားမှ သူကလက်မခံချင်ကြောင်း ၊ မတော်၍ ရောက်လာခဲ့လျှင်တော့ မဖြစ်မနေ ညှပ်ပေးရကြောင်းပြောသည်။
`ငါက မင်းတို့လူမျိုးလောက် ဘယ်လူမျိုးမှ စေတနာမရှိဘူးကွ´
သူ့ဆိုင်ကလေးထဲသို့ ရောက်သွားသည်နှင့် သူပြောခဲ့ဖူးသော စကားများကနားထဲသို့ ပြန်ရောက်လာသည်။ ဘေးချင်းယှဉ်ချထားသော ခုံလေးခုံအနက်မှ မလဲရုံတမည်သာရှိတော့သော အစုပ်ဆုံးခုံအား လက်ညှိးထိုးပြသည်။ နံရံတွင်ချိတ်ထားသော ခြုံလွှာများအနက် ညစ်ပေ့ဆိုသော ခြုံလွှာဖြင့် ကျွန်တော့်ကိုခြုံသည်။ ခုံပေါ်တွင် သူပြုသမျှနုရန် အဆင်သင့်ဖြစ်သောအခါမှ `ခဏ´ဟုဆိုကာ မည်သည့်နေရာတွင် သုံးမည်မသိသော ဓါးတစ်ချောင်းအား သွေးကျောက်တွင် ဘယ်ညာခတ်နေသေးသည်။
သူ့ဆိုင်ကလေးတွင် စာအုပ်သတင်းစာမျိုးစုံနှင့် ခေတ်မှီပစ္စည်းကိရိယာတို့က နေရာလွတ်မရှိအောင်ပင် အမျိုးအစားစုံလင်လှသည်။ ကြော်ငြာထဲတွင် မကြာခဏတွေ့ရတတ်သော အကောင်းစားမုတ်ဆိတ်ရိတ်ဓါး၊ ဆံပင်ညှပ်မော်တာ စသည်တို့မှာလည်း မြင်ရုံနှင့် ဆံပင်ညှပ်ချင်စိတ်တို့ကို တဖွားဖွားပေါက်လာနိုင်သည်။
ဆံသဆရာသည် အမှတ်တမဲ့ကြည့်လျှင် ခွဲစိတ်ခန်းထဲသို့ ၀င်တော့မည့် ဆရာဝန်တစ်ဦးကဲ့သို့ ၀တ်စုံပြည့်နှင့်ဖြစ်သည်။ ကုတ်အင်္ကျီအရှည် အဖြူသန့်သန့် ၊ ဦးထုတ်၊ ပါးစပ်အုပ်၊ ဆံပင်ညှပ်ချိန်တွင်သာ သုံးရန်ဟုရည်ရွယ်ထားပုံရသော ဖိနပ်ကိုပင်လဲစီးလိုက်သေးသည်။
ကျွန်တော့်မှာတော့ လည်ပင်း၌ ခပ်တင်းတင်းဆွဲစည်းထားသည့် ဆံပင်မွှေးများရှိသော ခြုံလွှာကြီးကြောင့် နေရထိုင်ရခက်နေပြီ။ ပြုတ်ထွက်လုမတတ်ဖြစ်နေသော နောက်မှီအား မမှီရဲသဖြင့် ခန္ဓာကိုယ်ကို ခပ်တောင့်တောင့် ထိုင်ထားရသည်။ အခြားတဖက်မှ ဆိုဖာခုံ အသစ်သစ်စက်စက်ကြီးများက ကျွန်တော့်အား လှောင်ပြောင်နေသယောင် ခံစားရသည်။ ထိုအချိန်မှ ကျွန်တော် သတိပြုလိုက်မိသည်။ ကျွန်တော်ဝင်လာခါစက ဖွင့်ထားသော လေအေးပေးစက်ကိုပင် ပိတ်၍ပစ်ခဲ့သည်။
သူ၏အမူအယာသည် ကျွန်တော့်သစ်သီးဆိုင်လေးထဲတွင် ဆုံခဲ့စဉ်က အမူအယာမျိုးမဟုတ်တော့။ သူ့တာဝန်ကိုသာ ကျေပွန်အောင် ထမ်းဆောင်မည့်ဟန် ခပ်တည်တည်ခပ်တင်းတင်း ဖြစ်နေသည်။ ပါးစပ်တွင်စည်းထားသော အ၀တ်သာမရှိပါက နှုတ်ခမ်းများကို ကိုက်များထားလေမလားကျွန်တော်တွေးမိသည်။
သူ့ဓါးအား စိတ်ကြိုက်သွေးပြီးချိန်ရောက်မှ လမ်းဘေးသစ်ပင်များ ပြုပြင်သူတစ်ယောက်ကဲ့သို့ ကျွန်တော့်ခေါင်းကို တဂျပ်ဂျပ်ဖြင့် ညှပ်ချတော့သည်။ မည်သို့မည်ပုံ ညှပ်မည်နည်းဟု တစ်ခွန်းတစ်ပါဒမျှမမေး။ ကျွန်တော်နှစ်သက်သည့် ဆံပင်ပုံစံကိုပြောပြချင်သော်လည်း လုံးဝပြောင်းလဲသွားသော သူ့အမူအယာကိုမြင်ပြီး မ၀ံ့မရဲဖြစ်သွားခဲ့ရသည်။ စိတ်ရှိလက်ရှိလုပ်ပါစေတော့ဟု မျက်လုံးကိုသာ စုံမှိတ်ထားလိုက်တော့သည်။ နားထင်နှင့် လည်ဂုတ်ပေါ်သို့ ဓါးနှင့် ဆွဲချပြီးချိန်ရောက်မှ ပြီးပြီအထင်နှင့် မျက်လုံးကို ပြန်ဖွင့်လိုက်သည်။
သွားပြီ။ နောင်တသည်နောက်ကျမှ ရောက်လာသည်ဟုသာ ကြားဖူးသည်။ ယခုမူ နောင်တသည် မျက်စေ့တစ်မှိတ်အတွင်း ရောက်လာခဲ့သည်။ ကျွန်တော့်ဆံပင်ပုံစံသည် ကိုရင်ပေါက်စ ကတုံးရိပ်ရန်မေ့လျော့သဖြင့် ရှည်ထွက်စပြုနေပြီဖြစ်သောပုံစံမျိုး ။ မျိုချထားသော အရာအားပြန်လည်အန်ထုတ်၍ရသလိုမျိုး အန်ထုတ်ပစ်၍ရမည်ဆိုလျှင် သူ့ဆိုင်လေးထဲသို့ ၀င်လာခဲ့မိသည့် ကျွန်တော့် ခြေလှမ်းတွေကိုသာ အန်ထုတ်ပစ်လိုက်ချင်သည်။
ကိစ္စအားလုံးပြီးပြီးချင်း သူက ကျွန်တော်လုံးဝထင်မှတ်မထားသော ဈေးနှုန်းတစ်ခုအား ရွတ်ပြသည်။ အထူးနှုန်းဟုဆိုသည်။ ပိုက်ဆံအိတ်ကို ဆွဲထုတ်လိုက်သော ကျွန်တော့်လက်သည်ပင် လမ်းခုလတ်တွင် တန့်သွားမိအောင်ဖြစ်သည်။ သို့သော်ကျွန်တော်သည် သူ၏သတ်ကွင်းထဲသို့ ၀င်ခဲ့မိသောသားကောင်။
ကျသင့်ငွေကိုရှင်းပေးပြီး သူ့ဆိုင်ကလေးကို ကျွန်တော်ကျောခိုင်းပစ်ခဲ့သည်။ ဤသည်မှာ ပထမဆုံးအကြိမ်နှင့် နောက်ဆုံးအကြိမ်လည်းဖြစ်ခဲ့သည်။ သူကတော့ သူ့ဆိုင်ကလေးရှေ့မှ ကျွန်တော်ဖြတ်လျှောက်သွားသည့်အခါဖြစ်စေ ၊ ကျွန်တော့်သစ်သီးဆိုင်လေးသို့ သူ လာဝယ်လျှင်ဖြစ်စေ ကျွန်တော့်အားမှတ်မိနေသည့်ဟန် မျက်နှာရိပ်မျက်နှာကဲ ပြနေသေးသည်။ ကျွန်တော်၏ဆံပင်အား ရှည်မရှည်ကြည့်တာလည်းဖြစ်နိုင်ပါသည်။ ယခင်က ကျွန်တော်ကဲ့သို့ ကြုံဖူးသောမိတ်ဆွေတစ်ယောက်ကတော့ ပြောသည်။
`အဲဒီ တရုတ်က ခေါ်ပြီးမှ ဆော်တာ´ ဟူ၍ ။
ကျွန်တော်ကတော့ သူ မည်မျှပင် လေပြေသွေးစေကာမူ ကျွန်တော့်ဆံပင်နှင့်ပတ်သက်၍ ကျွန်တော်ကိုယ်တိုင် ရွေးချယ်ပိုင်ခွင့်ရှိသည်ဟု အပြည့်အ၀ယူဆသဖြင့် သူ့ဆိုင်ကလေးသို့ နောက်နောင်ဘယ်တော့မှ မသွားတော့ဟု ဆုံးဖြတ်ထားခဲ့သည်။
ယခုဤဆိုင်သည် ဒုတိယမြောက်ရွေးချယ်ထားခဲ့သော ဆိုင်ဖြစ်သည်။ ဆိုင်ကလေး၏ အပြင်ဘက်မှန်တံခါးတွင် မြန်မာလိုရေးထားသော `ဆံပင်ညှပ်ဆိုင်´ဟူသော စာလုံးကို တွေ့ရုံဖြင့် အာရုံကျနေမိခဲ့ခြင်းဖြစ်သည်။ သို့သော် လွယ်လင့်တကူ ဆုံးဖြတ်၍လာခဲ့သည်တော့ မဟုတ်ခဲ့။
အမွှေးအမျှင်ဗရပျစ်နှင့် ဆံသဆရာသည် စကားတပြောပြောနှင့်ညှပ်နေရာမှ နှစ်ယောက်ပြီးသွားခဲ့ပြီ။ အသက်ငယ်ငယ်၀၀ တစ်ယောက်က တစ်ခေါင်းလုံးရှိသမျှဆံပင်ကို ထိုးချပစ်ရုံသာဖြစ်၍ မြန်သည်။ တစ်ခေါင်းလုံးဖြူနေသော တရုတ်အဘိုးကြီး အလှည့်ကျတော့လည်း အပေါ်တည့်တည့်တွင် ဘုတ်စုလေးသာထား၍ ပတ်ပတ်လည် အပြောင်ညှပ်ပစ်ရုံသာ။ သူ့အလှည့်တွင်လည်း မြန်သည်။ ကြာနေသည်က ခပ်တောင့်တောင့်၊ ထောင်ထောင်မောင်းမောင်း အိန္ဒိယအမျိုးသားအလှည့်။ လူမျိုးတူ၊ စကားတူဖြစ်သောကြောင့် ပြောလိုက်ကြသည့်စကား။ စကားအခွန်းတစ်ရာတွင် ကပ်ကြေးတစ်ချက်ထိုးစနစ်ဖြင့် သွားနေသလားဟုပင် ထင်မိသည်။ သူတို့ပြောသည့်စကားတို့အား နားမလည်သူ ကျွန်တော့်အဖို့တော့ ဆက်ရက်နှစ်ကောင် ဟစ်ဟော့သီချင်းဆိုနေကြသလို နားထဲအခံရခက်လှသည်။
ပြီးတော့ ကျွန်တော်အိပ်ငိုက်ချင်နေပြီ။ ညဆိုင်းအလုပ်မှ ထွက်ထွက်ချင်း အ၀တ်အိပ်ယူရုံသာ အဆောင်သွားခဲ့ပြီး တန်းလာခဲ့ရသည်ဆိုတော့ ကျွန်တော့မျက်လုံးတို့က ခံနိုင်ရည်အားမဲ့နေကြပြီ။ တရုတ်၏ဆိုင်သို့သွားလျှင်တော့ မြန်မြန်ဆန်ဆန် ကတုံးဖြစ်သွားနိုင်သည်။ သို့သော်ဆက်စောင့်နေရန်သာ ဆုံးဖြတ်၍ စိတ်ဒုံးဒုံးချနေလိုက်သည်။
အချိန်မည်မျှကြာသွားသည်မသိ။ ဆူဆူညံညံအသံများကြားလိုက်တော့မှ မှေးခနဲဖြစ်သွားရာကနေ ကျွန်တော်သတိပြန်ဝင်လာသည်။ ဆိုင်ကလေးထဲသို့ နောက်ထပ်လူတော်တော်များများ ၀င်လာတာတွေ့ရသည်။ အသက်သုံးနှစ်ခန့် ကလေးတစ်ယောက်ကို လက်မှဆွဲ၍ ခြောက်လခန့်ရှိသော ဗိုက်တစ်လုံးနှင့် အင်ဒိုနီးရှားဟု ယူဆရသော အမျိုးသမီးတစ်ယောက်လည်း ၀င်လာသည်။ သူတို့ထံမှအကြည့်ကို ခွာလိုက်စဉ်မှာပင် ကျွန်တော့်အလှည့်ရောက်လာသည်။
ဆုံလည်ကုလားထိုင်ပေါ်သို့ ထိုင်လိုက်သည့်ခဏမှာပင် ဆံသဆရာက ထုံးစံအတိုင်းခြုံလွှာကြီးအား ကျွန်တော့်ကိုယ်ပေါ်သို့ ကျွမ်းကျင်စွာစည်းနှောင်လိုက်ပြီးဖြစ်သည်။
`ဘယ်လိုပုံစံ လိုချင်လဲ´
သည်တစ်ခါတော့ ကျွန်တော်ကံကောင်းသွားသည်။ စိတ်ထဲ၌လည်း ဆံသဆရာ၏ အလိုက်သိတတ်မှုကို ကျေးဇူးတင်သွားရသည်။
`ဒီလို … ဒီလို´
လက်ဟန်ခြေဟန်များများ ၊ မလေးစကားနည်းနည်းဖြင့် ကျွန်တော်ဆန္ဒရှိသည့်ပုံစံအား ပြောပြလိုက်သည်။
`မနက်ကပေးထားတာနဲ့ မလောက်ဘူးလား´
ဆံသဆရာက အရင်းမပါ အဖျားမပါနှင့် စကားကို ခပ်ပြတ်ပြတ်ပြောလိုက်တော့ ကျွန်တော့်မှာလန့်သွားရသည်။ သတိထားကြည့်မိတော့မှ ဗိုက်ပူပူနှင့် အင်ဒိုနီးရှား အမျိုးသမီးအား မေးလိုက်ခြင်းဖြစ်မှန်း သိရသည်။ ဧကန္တ သူ့မိန်းမဖြစ်ရမည်ဟု ကျွန်တော်တွေးလိုက်မိသည်။
`ဒီမှာ ခေါင်းတစ်ခေါင်းကို ဘယ်လောက်ပင်ပန်းလဲ သိလား´
`ဗျိ´
ဆံသဆရာ၏ သိလားဟူသော စကားနှင့်အတူ လက်ထဲမှ မော်တာကတ်ကြေးက ကျွန်တော့်ဆံပင်အုံထဲ ထိုးဆင်းသွားသည်။ သွားပြီ။ ကျွန်တော်မှန်ထဲကို တစ်ချက်စောင်းငဲ့ကြည့်ဖို့ ကြိုးစားလိုက်သည်။
`ခေါင်း မလှည့်နဲ့´
ဆံသဆရာက အားနေသော သူ့လက်တစ်ဖက်ဖြင့် ကျွန်တော့်ခေါင်းအား ချက်ချင်းဆွဲလှည့်သည်။ ဘာတတ်နိုင်မည်နည်း ။ ကျွန်တော့်ခေါင်းက သူ့လက်၏ အလိုရှိရာကို ပါသွားသည်။ တဆက်တည်း ဘောင်းဘီအိတ်ထဲမှ ပိုက်ဆံကို ထုတ်ယူ၍ ဗိုက်ပူပူ အမျိုးသမီးဆီသို့ ပစ်ပေးလိုက်ရင်း အိန္ဒိယလိုတစ်မျိုး၊ မလေးလိုတစ်သွယ်ပြောပြန်သည်။ အင်ဒိုအမျိုးသမီးနားလည်၏ မလည်၏တော့ ကျွန်တော်မသိ။ ဆဲနေသည်ဟု ထင်မိသည်။
`ဆောရီး´
ဆံသဆရာက`ဆောရီး´ဟုပြော၍ ကျွန်တော့်ခေါင်းဆီ အာရုံပြန်ရောက်လာသည်။ ကျွန်တော် တော်တော်စိတ်ပျက်သွားသည်။ ခေါင်းတပ်ထားသော ရေဗူးဖြင့် ကျွန်တော့်ခေါင်းအား တရှုးရှုးဖြင့် ဖြန်းနေပြန်သည်။ ထို့နောက် တစ်ခြမ်းပြောင်နေသော ခေါင်းအား ဘီးဖြင့် လှည့်ပတ်ဖီးကြည့်နေသည်။ အဘယ်ကဲ့သို့ ပြန်ညှပ်ရမည်ကို စဉ်းစားမရဖြစ်နေဟန်တူသည်။ သူလုပ်ပုံက ငိုတတ်သည့်ကလေးကို စ နေသလိုဖြစ်နေသည်။ ကျွန်တော့်မှာ စိတ်ကို မနည်း ချုပ်တည်းထားရသည်။
`ဒီလိုဆို အဆင်ပြေလား´
ကျွန်တော့်မေးစေ့ကို ခပ်ဖွဖွကိုင်ရင်း ဆံသဆရာက မေးပြန်သည်။ သူအဲသည်လို မေးသည့်အခိုက်မှ ကျွန်တော့်မှာမှန်ထဲသို့ ကြည့်ခွင့်ရတော့သည်။ အနည်းငယ်ဝိုင်း၍ မေးရိုးကားကားဖြင့်ရှိသော ကျွန်တော့်မျက်နှာက အညာအရပ်မှ တဲအပျက်တစ်လုံးအား ထန်းရွက်များဖြင့် တစ်ဝက်တစ်ပျက် မိုးထားသလိုရှိသည်။
`အဆင်ပြေသလိုသာ လုပ်တော့ဗျာ´ ဟု စိတ်ပျက်နေပြီဖြစ်သော လေသံဖြင့် ကျွန်တော်ပြောလိုက်သည်။ ဖြစ်နိုင်လျှင် ထိုင်ခုံပေါ်ကနေ ကိုယ်ယောင်ဖျောက်၍ ထွက်ပြေးလိုက်ချင်သည်။ နောက်မှ တန်းစီစောင့်ဆိုင်းနေသောသူတို့မှလည်း ပွစိပွစိဖြစ်နေကြပြီ။
ဆံသဆရာက ပုံပျက်သွားပြီဖြစ်သော အခြားတစ်ဖက်နည်းတူ `ဗျိ´ခနဲ ထိုးချလိုက်ပြန်သည်။ ကျွန်တော့်ဆံပင်ပုံစံသည် ကြက်ဖတစ်ကောင်၏ ခေါင်းပေါ်မှ အမောက်ကဲ့သို့ ဖြစ်သွားသည်။ ထိုကနောက် ဆံပင်ပါးသော ကတ်ကြေးဖြင့် တချပ်ချပ်ပါးပြန်သည်။ ကျွန်တော့်မှာ ငှက်ဖျားရောဂါ ခံစားရစဉ်က ဆံပင်များကျွတ်ဖူးတာကို သွားသတိရသည်။ ဆံပင်ပုံစံမှာ ကျိုးတိုးကျဲတဲ မညီမညာဖြင့် မြက်ခြောက်တောကို လေဝှေ့ထားသလိုဖြစ်နေသည်။
`ဆရာ´
ကျွန်တော်စိတ်ထဲမှ ဖြစ်နေသော ဆန္ဒနှင့် ဆန့်ကျင်စွာ အညင်သာဆုံးဖြစ်အောင်ခေါ်လိုက်သည်။
`ပြော၊ ဘာလဲ´
`ကတုံးတုံးချင်တယ် ရမလား´
`ဘာကွ´
ထို `ဘာကွ´ ဆိုသော အသံလောက်သာ ထွက်လာသည်ကို ကျေးဇူးတင်ရမည်။ မတော်၍ ထုပစ်လျှင်ပင် ကျွန်တော့်မှာ ငုံ့ခံရုံသာရှိသည်။ ဆံသဆရာသည်သူ့ပညာအား အထင်သေးစကားဆိုသည်ဟု ထင်သွားပုံရသည်။
`မဟုတ်ဘူး၊ ကျွန်တော်ဒီပုံ မကြိုက်ဘူး´
ထိုထက်နားဝင်ချိုအောင် ပြောချင်ပေမယ့် ကျွန်တော့်မှာထိုမျှသာ ပြောတတ်သည်။
`ဒါအင်တာနေရှင်နယ်ပုံစံကွ´
ဆံသဆရာက ပြောပြောဆိုဆို ကျွန်တော့်ခေါင်းကို သာ ဆက်ညှပ်နေပြန်သည်။ သူ၏ အင်တာနေရှင်နယ်ပုံက မြန်မာပြည်ပြန်ရောက်လျှင် ကျွန်တော် အရှက်ကွဲတော့မည်။ မှန်ပါသည်။ နောက်နှစ်ရက်အတွင်း မြန်မာပြည်ပြန်တော့မည် ဖြစ်သဖြင့် သည်ကနေ့ ဆံပင်လာညှပ်ခြင်းဖြစ်သည်။
တရုတ်ဆိုင်သွားပြီးသည့်နောက်ပိုင်း ကျွန်တော့်ဆံပင်အား လုံးဝမညှပ်ဘဲထားခဲ့သည်မှာ အတော်ကြာခဲ့ပြီ။ ရှည်လည်း ရှည်လျားလွန်းခဲ့သည်။ ယခု မြန်မာပြည်ပြန်တော့မည်ကြံကာမှ ညှပ်ပစ်ဦးမှဟု တွေးမိ၍ သူ့ဆိုင်ကလေးကို ရွေးချယ်မိခဲ့ခြင်းဖြစ်သည်။
`ပြီးပြီ´
ကျွန်တော်အတွေးထဲ၌ နစ်မျောနေချိန်တွင် ဆံသဆရာထံမှ ပြီးပြီဟု အသံထွက်လာသည်။ ပုဝါနှင့် လည်ဂုတ်များကို ပွတ်ပေးသည်။ တို့ပတ်တွင် ပေါင်ဒါမှုန့်များကိုတို့ကာ နားထင်နှင့် နားရွက်ကြားများပါမကျန် ပွတ်သပ်ဆွဲပေး၍ သူ့လုပ်ငန်းအား လက်စသိမ်းနေပေပြီ။
ကျွန်တော့်မှာ ထိုအခါတွင်မှ မှန်ထဲသို့ အားရပါးရကြည့်ခွင့်ရတော့သည်။ မှန်ထဲ၌ ကျွန်တော်နှင့် ခွဲမရအောင်တူသော လူစိမ်းတစ်ဦးက ကျွန်တော့်ကို စိမ်းစိမ်းကြီး စိုက်ကြည့်နေတာကို တွေ့လိုက်ရသည်။ ကျွန်တော့်အကြောင်းကို ခရေစေ့တွင်းကျ သိထားပုံရသော သူ့ထံမှ စကားတစ်ခွန်းထွက်ကျလာသည်။
`ကောင်းတယ်၊ တော်တော်ကြေးများတဲ့ကောင် ။ အခုတော့ မင်းဆံပင်ပုံစံ ပျက်သွားပြီမဟုတ်လား.. ဟား..ဟား…ဟား…´
ထိုသူက ဟားတိုက်၍ပင် ရယ်နေသေးသည်။ လူတစ်ယောက်သည်မိမိ ဆံပင်ပုံစံကို မိမိစိတ်ကြိုက်ဖြစ်အောင် ကြေးများခွင့်ရှိသည်ဟု ကျွန်တော်က ယူဆထားသဖြင့် သူက ကျွန်တော့်အား အပြစ်မြင်နေပုံရသည်။ ကျွန်တော်ပြုံးရုံသာပြုံးပြ၍ ဆိုင်ထဲမှ ပြန်ထွက်ခဲ့သည်။
ဆိုင်ကလေး၏ အပြင်ဘက်တွင်တော့ မလေးရှားနေက ထုံးစံအတိုင်း ကီးအမြင့်ဆုံးဖြင့် ပူလျှက်ရှိသည်။ ဤရာသီဥတုဖြင့် သုံးနှစ်ခန့် နေသားတကျဖြစ်ခဲ့သော ကျွန်တော်သည် အမိမြန်မာပြည် ရာသီဥတုနှင့် လိုက်လျောညီထွေဖြစ်အောင် တော်တော်လေ့ကျင့်ယူရဦးမည်ဟုတွေးမိသည်။ ဥပမာ၊ ဆံပင်ညှပ်ဆိုင်ရွေးရသည်က အစ။
လူခါး
စာပွင့်လွှာရသစုံ မဂ္ဂဇင်း၊ ၂၀၁၂ ၊စက်တင်ဘာ
No comments:
Post a Comment